عراك القطط

لو سمحتوا حد يرد عليا ضرورى لان القطط اتخانقوا جامد جدا وانا اتعورت بسببهم وكمان القطة كانت بتعمل اسهال ريحتة كريهة جدا وهما بيضربوا بعض والقط كان بيتكتك بسنانة ومبرق وجسمة بيرتعش يعنى حصلت كارثة فى الشقة حاولت ابعدهم عن بعض بكل الطرق معرفتش وغرقتهم مية وبردة من غير فايدة وحبست القط شوية فضل يعيط وبعد كدة ضربوا بعض تانى اعمل اية انا فعلا خايفة منهم ومش لاقية حل

اولا يا ريت تتأكدي من نظافة و صلاحية الأكل اللي بيتقدم ليهم كويس

لأن الإسهال ده مش طبيعي في القطة

يا ريت تقوليلنا نظام اكلهم

و بالنسبة للعراك

لازم يتم الفصل بينهم

هما بياكلوا اكل كويس ونضيف وانا اللى بعملة خضار وعيش وبياكلوا لانشون وجبنة نستو وبجيبلهم كمان هياكل الفراخ وببنضفها كويس واعملها بطريقة كويسة يعنى فعلا الاكل نضيف
هى بتعمل على روحها وهى بتتخانق من شدة الرعب من القط لكن فى العادى اخراجها طبيعى وعلى فكرة انا فصلتهم عن بعض بخلية لوحدة وهما برة الاوضة او العكس لكن مفيش فايدة اول ما بيشوفوا بعض بيتحفزوا ويبقوا هيتخانقوا
اية السبب فى الحالة دى مع انهم اجوزا قبل كدة كتير من غير خناق بالفظاعة دى انا سالت جمعية امروا وقالولى انى اعقم الذكر وهما هيبطلوا خناق وسالت فى كذا منتدى وكل واحد بيقولى كلام شكل يعنى قالوا العملية مش هتعمل حاجة دول بيتخانقوا لفرض السيطرة ولو عملت عملية هيبقى ضعيف وهيضربوة ومحدش هيرضى ياخدة لو انا مش عايزاة بعد كدة وكلام كتير انا مش عارفة اعملة عملية ولا لا ؟ مش عايزة اخد ذنبة ومش عارفة اخليهم يبطلوا خناق
اتصرف ازاى واسفة والله جدا على الاسئلة كل شوية

الحل ان يبقى فيه ذكر واحد مع انثى واحدة

يا إما تجيبي ذكر جديد ليهم مع الذكر القديم

يا إما تمشي انثى من الإتنين الموجودين

و بالنسبة للعملية مش هتعمل فرق

لأنها هتمنع الخلفة بس

لكن ملهاش تأثير على العنف ده

لأن العنف ده سببه فرض السيطرة مش أكتر

طب سؤال كمان يعنى لو اضطريت انى امشى واحدة اية الاحسن والاامن عليها اوديها الجمعية لو فيها مكان فاضى ولا اديها لاى حد من النت لان القطة شقية جدا وسلوكها غريب ومش اى حد هيستحملها وهى من صغرها كدة

لو زي ما بتقولي يبقى الأحسن ليها الجمعية بس خلي بالك من التعقيم !! بلاش منه

و في حل بديل انك تجيبيلها حد تاني ذكر

يا ريت اعرف بوكس القطط اجيبة منين فى محلات مخصوص ولا اية ؟

حضرتك في انهي منطقة بظبط

احنا فى الشيخ زايد وفى فى هايبر بوكسات بس اللى كان موجود صغير ياخد قط واحد بس وحسيت ان سعرة غالى شوية بالنسبة لحجمة وانا عايزة واحد كبير ياخد التلاتة مع بعض لانى باذن الله هخليهم عندى على طول
انا بس عايزاة بسرعة لانى هودى القط للدكتور

انا عايزة اعرف من حضرتك لو عملت للقط عملية هتضرة ولا هيبقى الوضع احسن انا والله احترت وتعبت من كتر التفكير بس مش هينفع انى اجيب قط تانى او امشى اى واحدة فيهم لاسباب كتيرة جدا والخناق زى ما هو من اكتر من تلات اسابيع وفعلا الموضوع دة عامل مشاكل جامدة فى البيت مش يمكن لو بقى هادى ميتخانقوش بدل ما امشى حد فيهم ودة مستحيل
انا مستحرمة العملية بس سالت كذا دكتور وشجعونى عليها بس انا مترددة وخايفة لكن حاسة ان مفيش حل غير كدة وانا كدة كدة مش عايزاهم يخلفوا لانى مش هعرف اتصرف فى ولادهم ومش هيهون عليا ارميهم
الله يكرمك تقولى انا كدة هضر القط وااذية ولا عادى لانى خلاص هجنن

اولا انا بشكرك على إهتمامك و رعايتك و خوفك على قططك

و يا ريت كل الناس في مصر تخاف و تحافظ على القطط كده

بالنسبة للعملية هيا مش هتضره او تنفعه لأنه مش بيحس بيها

هوا بس بيحس في الم في اول ساعات زوال البنج و مع الوقت مش بيحس بحاجة

لكن الضرر بيكون انه خلاص مش بيقدر يتكاثر او يحس انه محتاج انثى مرة تانية

لكن خليني اسأل سؤال

تفتكري لو عمل العملية الموضوع هيتحل !!

بالعكس

لأن معاكي لسه قطتين و دول لازم يجي عليهم وقت و يبقوا محتاجين تزاوج برده

يعني المشكلة مازالت قائمة

لكن ابسط الحلول انك توديه او تودي حد منهم للتزاوج يوم و تاخديه تاني

زي جمعية ايمرو مثلا

او حد من جمعية اصدقاء الحيوان

لكن بالنسبة للعملية انا مش بحبذها بصراحة

هوا كرأي علمي مفيش مشاكل

و لكن كرأي دين في علماء بيحرموا إخصاء الحيوان بدون سبب قوي او بدون إحتياج قوي لده

و في علماء تانيين بيجيزوا العملية دي لو في اي مصلحة و لو بسيطة

و الموضوع في الآخر راجعلك

لكن انصحك بلاش

و بالنسبة للبوكس اللي حضرتك بتسألي عليه

هوا فعلا في هايبر هيبقى غالي شويه

هوا موجود منه بأحجام كبيرة و رخيصة في مكانين

اولهم جمعية أصدقاء الحيوان و دي بتبقى الأسعار فيها رمزية بدون ربح يذكر

و التاني سوق السيدة عيشة و بيبقى ارخص طبعا لكن المشوار طويل

لكن الاحسنلك يا إما تجيبي البوكس ده من الجمعية

او تتفقي مع نجار يعملك ركن في الأوضة يتقفل بسلك

و يبقى جزء خاص بالقطط بس

ايه رأيك مش احسن ؟

السلام عليكم
كنت عايزة اعرف هل فى اى طريقة لمنع رش البول لان اطؤوز مبهدل الدنيا وبيعمل كتير جدا اكنة عامل حمام وانا غلبت معاة

الحمام بتاعه رمل ؟ ولا معوداه على ايه بظبط ؟؟

ايوة هو بيعمل حمام فى الرمل والحكاية دى جديدة يعنى الاول كنت بلاقى نقط مية على الارض بس بسيطة دلوقتى تقريبا بيعمل حمام على الانترية
بيغرقة وعلى الخشب على الكمودينو ومرة على الكاسيت يعنى اى مكان بيروح عامل فية حتى بعد ما اجوز بيعمل كدة وبردة بيتختنق مع القطط
وبيعد ينونو بصوت عالى زى العياط ويشمشم مكان ما بيعدوا

على فكرة دي لو ذكر

يبقى دي علامات انه عايز يتزاوج

ايه الأخبار معاه ؟

ايوة هو ذكر واجوز كتير قبل كدة بس حكاية تغريق الفرش اوى كدة دى جديدة وهو فعلا بيعمل كدة عشان الجواز مع ان معاة اتنين اناث وحتى بعد الجواز بيوم واتنين بيعمل كدة والمشكلة فعلا انة دايما عايز يجوز كل كام يوم يعنى بيعمل كدة كتير اللى انا عايزة اعرفة فى طريقة تبطل تخلية يعمل كدة

يبقى كده احنا عرفنا العرض اللي عنده ده من ايه

انما الحل انه لازم يتجوز او على الأقل يكون في انثى جديدة يتجوزها و يرجع مكانه تاني

السلام عليكم
عندى مشكلة مع القطط ومش عارفة اتصرف فيها وهى مشكلة الخناق الدائم اللى مش بيخلص بس الجديد فى الموضوع ان كمان البنات بيتخانقوا مع بعض
على فكرة كوكو ولدت من اسبوع وجابت قطة واحدة بس والغريبة انها مرضعتهاش وسبتها تموت كمان انا اكتشفت ان كوكو مش بتشوف خالص مغرفش هى كدة من الاول ولا حصلها حاجة يعنى هى قطة عمياء
هى النهاردة بتنزل افرازات صفراء كتير من مكان الولادة وبتتخانق جامد جدا مع بيسومش عارفة اتصرف وكمان الولد بيتخانق مع بيسو
اية الحل فى الموضوع دة لانى خلاص والله غلبت معاهم ومعلش عندى اسئلة كتير بنسبالهم لما اكتب مرة تانى

على فكرة القطط بتوعى اغرب قطط فى كل حاجة حتى فى الولادة
كوكو كانت ولدت يوم السبت اللى فات وجابت واحدة بس وماتت تانى يوم على طول لانها سبتها من غير رضاعة ولا اى اهتمام وسبحان الله فوجئت انها ولدت تانى امبارح وبردة جابت قطة واحدة بس يعنى ولدت بعد اسبوع بالظبط
انا مستغربة جدا واول مرة اشوف حاجة زى كدة بس هى المرة دى مراعياها كويس وبترضعها وقاعدة معاها
بس المشكلة الجامدة انها فى وئام مع الذكر وقاعد معاها عادى بس هى شرسة جدا مع الانثى التانية والتانية خايفة من القطة الصغيرة كمان وخايفة من كوكو ومستخبية من امبارح فى الاوضة بس كوكو مش سيباها هى اللى عمالة تهجم عليها
اعمل اية معاهم هما البنتين هيفضلوا يتختنقوا على طول ولا فى الاول بس
على فكرة انا طول عمرى بربى قطط بس بتكون واحدة بس لكن تلاتة مع بعض دى اول مرة وفعلا مش عارفة اسيطر عليهم

لازم التفرقة ما بينهم وخصوصا الإناث

بالنسبة للولادة دي فعلا شيء غريب شويه بس وارد جدا

اهم حاجة دلوقتي الفصل ما بين الإتنين

وجدت قطة صغيرة من اسبوعين وعمرها حوالى شهرالمشكلة ان مكان الاخراج عندها مليان دم وبتنزل دم فى البراز وهى لسة مش بتعرف تاكل وبتشرب لبن من القطارة وانا قلقانة تكون نقلتلى مرض لانها كذا مرة تعضنى وانا بفتحلها بقها وكمان قلقانة تعدى القط الصغير بتاعى او الكبار
كمان انا كنت حطاها فى مكان دافى لكن اضريت احطها فى البلكونة امبارح ولقيتها تانى يوم جسمها كلة متلج جدا ومش بتتحرك من مكانها ولا عايزة تشرب لبن انا حاولت ادفيها لكن مش بتتحسن ومتلجة بردة اول حاجة عايزة اعرفها لو بقت كويسة انا ممكن انزلها امتى الشارع
وتانى حاجة انا مش عارفة اتصرف فى القطط بتوعى لان عندى كدة خمس قطط والقطة حامل يعنى كمان شوية هيبقوا 8 او 9 قطط هل ممكن حد ياخد القطط الصغيرة بتوعى لما يكبروا شوية رحمة بيهم مع العلم ان القط لونة اسود يعنى قط بلدى عادى ولا هضطر ارميهم فى الشارع؟ وانا بكرة جدا الحكاية دى وارجو الرد والمساعدة

بالنسبة للقطط اللي عايزه تديهم لأي حد ممكن إيمرو ياخد منك بس على حسب الوقت لأن ساعات مش بيبقى عندهم مكان

و يا ريت صور ليهم عشان لو حد عايزهم اقدر اوريهمله ولو كده ياخدهم

بالنسبة للقط الصغير

نزول دم من فتحة الإخراج حاجة تقلق جدا

لكن الأفضل العزل التااااااااام ليها عن بقية القطط و النظافة الشديدة في التعامل معاها

واذا تعافت و شدت حيلها لازم تستني عليها فترة قبل الإستغناء عنها عشان تعرف تعتمد على نفسها

يا ريت برده لو امكن صور